Ya anuncia el Oficina del Veterinario del Ciudad cay nohay mas tene nuevo caso de African Swine Fever (ASF) dentro del 290 dias ya pasa.
Na mismo tiempo, asegun con Dr. Mario Arriola, el Veterinario del Ciudad, cay negativo de ASF virus el mga sampol del sangre ya colecta sila na mga ‘sentinel pigs.”
Asegun con Arriola, ta espera ya lang tamen sila con el Departamento de Agricultura para declara con el ciudad bajo el clasificacion de rosas o Amarillo.
“Si ta abla kita rosas o amarillo, puede ya kita manda ase manada con el populacion del mga puerco,” ya abla si Arriola press conference del martes.
Myentrastanto, asegun con Arriola cay ta mantene pa sila siempre el mga checkpoints na borde del ciudad de Zamboanga.
Si Arriola ya habla cay hinde pa sila ta permiti mga producto de carne desde’l mga lugar tiene caso de ASF entra aqui na ciudad de Zamboanga. (B. Garcia, photo courtesy of City Hall PIO)