MISUPORTA ni Mayor Rolando “Klarex” Uy ang paningkamot sa City Hall sa paghimo sa Cagayan de Oro City nga measles ug rubella-free, pinaagi sa paglunsad sa Measles-Rubella Supplemental Immunization Activity (MRSIA) nga ipahigayon sugod Enero 19 hangtod Pebrero 13.
Giawhag ang mga ginikanan nga adunay mga anak nga nag-edad og unom (6) ka bulan hangtod upat (4) ka tuig ug onse (11) ka bulan nga dad-on ang ilang mga anak sa mga designated fixed ug temporary vaccination posts sa ilang tagsa-tagsa ka lugar aron makadawat og proteksyon batok sa measles ug rubella.
Sumala kang Mayor Klarex, kauban ang City Health Office (CHO), libre ang bakuna ug importante nga unahon sa mga ginikanan ang kahimsog sa ilang mga anak aron malikayan ang mga sakit nga mapugngan pinaagi sa bakuna.
Ang unang adlaw sa immunization activity ipahigayon Lunes, Enero 19, sa Barangay Macasandig. Dili sama sa miaging mga kampanya, dili na house-to-house ang pagbakuna. Kinahanglan na nga ang mga ginikanan mismo ang modala sa ilang mga anak sa mga gitudlong vaccination stations alang sa maong kalihokan.
By: Cheleste Simene – Jomaya