Presko pa kaayo ang nasakmit nga kadaogan ni Cinderella Faye Obeñita sa Binibining Pilipinas isip Bb. Intercontinental apan laing pambato sa Misamis Oriental ang modala ug garbo ug makigtigi na usab sa gitakdang Miss Universe Philippines 2021.
Sukwahi sa mga naandan, usa ka “New Normal Screening Process” ang giandam sa MUPh organization sa pagpili sa mga kandidata agi og tubag sa kasamtangang sitwasyon nga giatubang tungod sa pandemya.
Si Chella Grace Falconer kinsa maoy Miss Kuyamis 2019 maoy magdala sa ngalan sa Misamis Oriental human kini nahimong kabahin sa top 100 delegates sa Miss Universe Philippines 2021 sa gipahigayon nga initial screening niadtong Hulyo 16-18 pinaagi sa zoom.
Sunod nga ipahigayon ang usa ka elimination pinaagi sa mga online challenges diin gikan top 100 mahimo na lamang kini nga top 75 ngadto sa top 50.
Hatagan sab og kahigayonan ang mga fans nga tabangan nga makasulod ang ilang kandidata pinaagi sa pag-boto niini sa Miss Universe Philippines app.
Apan dili pa diha matapos ang proseso sa pagpili gumikan kay 30 lamang gikan sa 50 ka mga semi-finalist ang itanyag nga opisyal nga kandidata sa Miss Universe Philippines 2021 pinaagi sa usa ka interview challenge nga isibya sa umaabot Agosto 30, 2021 ug ang coronation night niini gitakdang ipahigayon sa Setyembre 25, 2021.
Kahibaloan nga si Dannah Joy Tempra ug Katheryn Tan Guipetacio ang mibandera sab sa ngalan sa Misamis Oriental sa kasamtangang gipahigayon nga Miss World Philippines ug Miss Earth Philippines 2021.
Suportado ni Governor Bambi Emano ang mga kandidata nga magdala sa ngalan sa probinsya sa Misamis Oriental sa ilang pagsangka sa national pageant tungod kay sayod kini nga pinaagi niining maong plataporma, daghan pa nga katawhan dili lamang sa nasod apan lakip mga langyaw ang makaila ug makapamatuod nga ang lalawigan dili lamang napuno og maanyag nga katawhan apan labaw sa tanan, atraksyon nga siguradong ilang kaibgan, bisitahan ug balik-balikan.
(Source: Misamis Oriental Provincial Information Office Facebook page)