Nakab-ot sa Police Regional Office 7 (PRO7) ang dakong kalampusan batok sa kriminalidad atol sa tulo ka adlaw nga dinungan nga operasyon gikan Hulyo 28 hangtod 30, 2025. Sa maong operasyon, 353 ka mga tawo ang nadakpan ug kapin ₱15.2 milyon nga balor sa iligal nga drogas ang nakumpiskar.
Sa kampanya batok drogas, 195 ka drug suspects ang nasikop sa 163 ka operasyon. Nakuha sa kapulisan ang 2,243.47 gramos nga gituhuang shabu nga nagkantidad og ₱15,255,596.00, ug 23 ka punuan sa marijuana nga nagkantidad og ₱4,600.00. Wala’y na-neutralize nga drug personality sa maong kalihukan.
Sa operasyon batok iligal nga sugal, 34 ka operasyon ang gipahigayon diin 45 ang nadakpan. Gikumpiskar usab ang 68 ka buok sa gambling paraphernalia ug cash bet nga ₱10,772.
Sa kampanya kontra loose firearms, 43 ka operasyon ang nagresulta sa pagkasikop sa 20 ka tawo. Nakumpiskar o gisurender ang 42 ka armas ug 2 ka eksplosibo. Kini usa ka lakang aron malikayan ang bayolente nga insidente ilabi na sa umaabot nga mga kalihokan sa rehiyon.
Gihimo usab ang operasyon batok wanted persons, diin 93 ang nadakpan. Gikan niini, 14 ang giila nga Most Wanted Persons ug 79 ang Other Wanted Persons.
Gipasidunggan ni PBGen. Redrico A. Maranan ang tanang operatiba sa ilang kaisog ug paningkamot. Matod niya, ang matag drogas nga ilang nakumpiskar, matag armas nga narekober, ug matag suspetsado nga nadakpan usa kini ka lakang padulong sa mas luwas nga Central Visayas.
Source: PRO7
I via Renante Socia Lada