Nasakpan sa akto ang usa ka 29-anyos nga lalaki nga mituyo pag-adto sa female comfort room sa Cebu South Bus Terminal (CSBT) sa Brgy. Pahina Central, Cebu City, aron musuyop og shabu.
Nahitabo ang insidente pasado alas 12:30 sa udto niadtong Hulyo 31, 2025. Ang lalaki giila nga si Bryan De la Torre Del Puerto, ulitawo ug lumad taga Carcar City. Mitug-an siya nga naga-tabang-tabang ra siya sa pagbaligya og noodles sa Tabo sa Banay sa downtown Cebu City.
Sumala sa head guard sa CSBT nga si Alan Noquiao, usa ka babaye ang misumbong nga adunay lalaki nga nisulod sa kasilyas sa mga babaye ug nagpitik sa iyang lighter. Gisuwayan dayon og tan-aw sa gwardya ug didto nasakpan sa sulod si Del Puerto samtang nag-andam na og gamit sa drogas.
Gidala dayon ang suspetsado sa Carbon Police Station, ug gikasuhan kini sa paglapas sa RA 9165 o Comprehensive Dangerous Drugs Act. Nakuha gikan sa iyang posisyon ang usa ka aluminum foil, duha ka lighter, linukot nga foil ug usa ka improvised tooter.
Gipahimangnoan sa mga otoridad ang publiko nga magmatngon ug motabang sa pagpahibalo dayon kung adunay suspek nga buot mohimo sa kalapasan, ilabi na sa mga pampublikong lugar sama sa terminal.
I via Renante Socia Lada