Gibungkag sa Philippine National Police (PNP) ang usa ka dako nga ilegal nga operasyon sa sigarilyo sa Lapu-Lapu City nga miresulta sa pagkadakop sa pipila ka suspetsado lakip na ang mga foreign nationals, ug pagkasakmit sa kapin ₱1.1 bilyon nga kantidad sa peke nga tobacco products ug mga kagamitan sa produksiyon.
Nahitabo kini kagahapon Abril 10, gi-serve sa mga otoridad ang search warrant sa usa ka warehouse sa usa ka industrial park sa Barangay Basak. Didto nadiskubre ang liboan ka kahon sa sigarilyo nga gituohang adunay peke nga tax stamps, apil na ang mga makina ug hilaw nga materyales nga gigamit sa paghimo niini.
Lakip sa nadakpan ang upat ka Chinese nationals ug usa ka Pilipino. Karon sila anaa na sa kustodiya sa kapulisan ug nag-atubang og kaso alang sa falsification ug paggamit sa peke nga dokumento ubos sa Article 172 sa Revised Penal Code.
Sumala ni PNP Chief Police General Jose Melencio C. Nartatez Jr., kini nga operasyon nagpakita sa mas gipakusgan nga kampanya sa kapulisan batok sa mga ilegal nga kalihukan nga makadaot sa kita sa gobyerno ug pagsalig sa publiko.
Gipasidan-an usab niya ang publiko ug mga negosyante nga mag-amping sa pagpalit ug pagbaligya sa mga produkto, ilabi na kung katingad-an kaayo ang barato nga presyo.
Padayon ang PNP sa ilang operasyon batok sa peke ug ilegal nga produkto isip kabahin sa ilang Focused Agenda ug suporta sa kampanya sa gobyerno alang sa lig-on nga ekonomiya ug hapsay nga pagpatuman sa balaod.
Source: PNP PIO
I via Renante Socia Lada