Usa ka wanted nga tawo nga gipasanginlan sa pagpatay nadakpan sa usa ka joint operation sa Balamban niadtong Marso 9, 2026. Ang operasyon gihimo sa Tracker Team sa Balamban Municipal Police kauban ang tracker team sa Compostela Municipal Police Station, Davao de Oro.
Nadakpan ang suspek sa Barangay Vito, Balamban, sa sulod sa Bureau of Jail Management and Penology facility.
Ang nadakpan nailhan sa mga alias nga “Zosimo” o “Tata Bintik”, 46 anyos, ulitawo ug nagpuyo sa Sitio Patag, Barangay Cansomoroy, Balamban. Ang warrant of arrest gikan sa Regional Trial Court Branch 3 Nabunturan, Davao de Oro alang sa kaso nga murder, ug walay gihatag nga bail.
Ang Cebu Police Provincial Office nakig alayon sa mga police units sa lain-laing rehiyon aron pagsikop sa suspetsado.
Matod ni PCOL Abubakar Udang Manglen Jr., ang pagkadakop sa wanted nga tawo nagpamatuod sa kusog nga koordinasyon sa kapulisan ug sa pagpaningkamot nga madala ang hustisya sa mga biktima ug pamilya niini.
Gipasabot sa Philippine National Police nga padayon gihapon ang ilang intensibo nga operasyon batok sa mga wanted persons isip bahin sa paggarantiya sa kalinaw ug seguridad sa mga komunidad sa tibuok Probinsya sa Cebu.
Source: CPPO
I via Renante Socia Lada