Nasikop sa mga operatiba sa Dalaguete Municipal Police Station ang usa ka 49-anyos nga lalaki nga wanted sa kaso nga may kalabotan sa ilegal nga pagpanag-iya og pusil atol sa usa ka intelligence-driven operation sa Barangay Jolomaynon, Dalaguete niadtong nakalabay nga adlaw.
Giserbihan sa kapulisan ang suspek og warrant of arrest tungod sa paglapas sa Republic Act No. 10591 o ang Comprehensive Firearms and Ammunition Regulation Act. Ang maong warrant gi-isyu sa Regional Trial Court Branch 26 sa Argao, Cebu.
Matud sa CPPO, walay gitakdang piyansa ang kaso sa maong akusado, maong dali siyang gidakop human mapamatud-an ang balido nga mando sa korte. Gipahibalo usab siya sa kaso nga iyang giatubang ug sa iyang mga katungod subay sa balaod.
Sumala sa kapulisan, ang pagdakop resulta sa padayon nga intelligence monitoring ug gipakusog nga kampanya sa Dalaguete Police aron masubay ug masikop ang mga tawo nga adunay outstanding warrant of arrest.
Human sa pagdakop, gidala ang suspek sa Dalaguete Municipal Police Station alang sa hustong dokumentasyon ug nagpabilin karon ubos sa kustodiya sa kapulisan samtang gihulat ang pagturn-over kaniya ngadto sa korte alang sa sunod nga legal nga proseso.
Gidayeg ni Cebu Police Provincial Office Director Abubakar Udang Mangelen Jr. ang mga pulis nga mipahigayon sa operasyon. Matud niya, magpadayon ang CPPO sa kampanya batok sa mga wanted person aron maseguro ang kaluwasan sa publiko ug ang hustong pagpatuman sa balaod sa tibuok probinsiya sa Cebu.
I via Renante Socia Lada