Ang tinguha nga makakwarta pinaagi sa social media, nahimong hinungdan sa pagkadakop sa usa ka vlogger sa Oslob, Cebu, human siya masikop sa National Bureau of Investigation-Central Visayas Regional Office (NBI CEVRO) tungod sa pagpakatap og fake news.
Ang nadakpan giila nga si Wendelyn Apduhan Magalso, lumad nga taga Barangay Lagunde, Oslob. Gilusad ang operasyon sa iyang panimalay niadtong Huwebes, Marso 20, nga gipangulohan ni NBI CEVRO Supervising Agent Francis Señora.
Sumala sa imbestigasyon, gi-edit ni Magalso ang usa ka quote card sa News 5 aron ipakita nga legal na ang paggamit sa ginadili nga drogas, usa ka sayop nga impormasyon nga posibleng makalibog sa publiko. Ang NBI Cybercrime Division nakadakop kaniya pinaagi sa pagsubay sa URL sa iyang Facebook account, diin nasubay ang maong post.
Sa iyang pamahayag, miangkon si Magalso nga ang iyang gihimo usa ka paagi aron makakwarta gikan sa iyang vlog nga na-monetize ug aron madugangan ang kita sa iyang pamilya.
Si Magalso kasuhan sa paglapas sa Article 154 sa Revised Penal Code (Illegal Use of Publication) ug sa Cybercrime Prevention Act (RA 10175) tungod sa pagpakatap sa peke nga impormasyon nga makadaot sa publiko ug estado.
Matud ni NBI Director Jaime Santiago, padayon nilang bantayan ug aksyonan ang mga kaso nga may kalabutan sa pagpakatap sa fake news sa social media. (Renante Socia Lada)
(Source: NBI-7)