Nakaplagan nga wala nay kinabuhi ang usa ka 55-anyos nga vlogger sa bukirang bahin sa Sitio Quadra, Barangay Lagtang, Talisay City, pasado alas 10:00 sa buntag niadtong Abril 10, 2025. Ang biktima giila nga si Feliciano Mulato, ulitaw ug usa ka tricycle driver nga nagpuyo sa Sitio Campo 3, Barangay Jaclupan, Talisay.
Gituohang lima na ka adlaw nga nawala si Mulato gikan sa ilang panimalay. Sa imbestigasyon sa kapulisan, nakadawat sila og tawag gikan sa mga barangay tanod mahitungod sa usa ka patay’ng lawas nga ilang nakit-an sa bukid. Sa ilang pag-abot, ilang nasaksihan ang lawas sa biktima nga anaa na sa advanced stage of decomposition.
Matud sa suod niyang higala nga si Bernabie Alegarme, kuyog pa sila sa biktima niadtong Abril 4 aron mag-vlog sa bukid. Nanaog sila alas 5:00 sa hapon, apan mibalik daw si Mulato kay nabyaan ang iyang sanina. Gibadlong pa siya ni Alegarme nga dili na mubalik kay hapit na ang gabii ug layo ang lugar apan mibalik gyud kini.
Gisusi pa sa kapulisan ang insidente ug nagpahigayon og imbestigasyon aron masuta ang hinungdan sa iyang kamatayon. Ang pamilya ni Mulato mipahigayon og autopsy aron masayran kung unsa gyud ang hinungdan sa kamatayon niini.
Padayon ang panawagan sa hustisya sa pamilya sa biktima nga naglaum nga matubag ang mga pangutana sa kalit nga pagkawala ug kamatayon sa ilang hinigugma.
I via Renante Socia Lada