Madawat na sa mga benepisyaryo ang nagkalain-laing porma sa ayuda human gi-aprobahan sa Commission on Elections (Comelec) ang hangyong exemption sa Dakbayan sa Sugbo aron mapadayon ang distribusyon sa mga tabang bisan pa sa election ban.
Ang Comelec nagpatuman og pagdili sa pagpagawas og pondo sukad Marso 28 hangtod Mayo 11, subay sa guidelines sa election period. Apan, sa giluwat nga exemption, gitugotan na ang lokal nga kagamhanan sa paghatag og ayuda nga nagkantidad og P310 milyon.
Lakip sa mga programang gi-aprubahan sa Comelec ang financial assistance alang sa mga nasunogan, biktima sa kalamidad, senior citizens, persons with disabilities (PWD), ug ang Assistance to Individuals in Crisis Situations (AICS). Apil sab ang livelihood program nga nagtumong sa pagpasiugda og panginabuhian, lakip na ang proyekto sa pagpadako og uhong.
Giklaro ni Mayor Garcia nga dili pa tanang pondo ang gi-aprobahan, ug anaa pa sa P5 milyon ang gigahin sa unang tranch.
Lakip usab sa mga gi-aprubahan nga programa mao ang tuition assistance alang sa mga Cebu City scholars ug burial assistance alang sa mga pamilyang nanginahanglan.
Padayon ang paningkamot sa City Hall aron masiguro nga makadawat og tabang ang katawhan bisan pa sa panahon sa eleksyon.
Source: Cebu City PIO
I via Renante Socia Lada
#rpndykccebu