Gipahibalo sa National Grid Corporation of the Philippines o NGCP nga moabot sa Red Alert ang Visayas power grid gikan alas-5 sa hapon hangtod alas-8 sa gabii karong Agosto 25, 2026.
Mugawas usab ang Yellow Alert gikan alas-2 hangtod alas-5 sa hapon, ug alas-8 hangtod alas-10 sa gabii. Ang available nga suplay sa kuryente anaa sa 2,421 megawatts, samtang ang peak demand o pinakataas nga panginahanglan gibanabana sa 2,570 megawatts.
Matod sa NGCP, usa sa hinungdan niini ang wala pag operate sa dagkong coal plants sa Visayas, lakip ang TVI 1, TVI 2 ug KSPC 1. Limitado usab ang power import gikan sa Mindanao tungod sa taas nga panginahanglan didto.
Ang Red Alert ipatuman kung kulang ang suplay sa kuryente kumpara sa panginahanglan. Samtang ang Yellow Alert ipagawas kung dili igo ang reserve o ekstra nga suplay para sa posibleng problema sa grid.
Gipahibalo usab nga adunay mga planta nga naka-forced outage ug 13 ka planta nga nag-operate sa ubos nga kapasidad, nga miresulta sa 904.5 megawatts nga dili magamit sa grid.
I via Renante Socia Lada