Magpatuman og Red Alert ang Visayas power grid karong Septiyembre 24, gikan alas-4 sa hapon hangtod alas-9 sa gabii, sumala sa advisory sa National Grid Corporation of the Philippines o NGCP.
Adunay Yellow Alert gikan alas-2 hangtod alas-4 sa hapon, ug usab alas-9 hangtod alas-10 sa gabii. Sa datos alas-8 sa buntag, 2,292 megawatts (MW) ang available nga kuryente samtang 2,495 MW ang gipaabot nga peak demand.
Sumala sa NGCP, 949.9 MW ang dili magamit sa grid tungod sa 17 ka power plants nga forced outage ug laing 17 ka planta nga nag-operate sa ubos nga kapasidad. Lakip sa wala magamit ang dagkong coal plants nga TVI 1, PEDC 3 ug KSPC 2.
Naapektuhan usab ang power supply tungod sa temporaryong pagkawala sa power import gikan sa Luzon human gipangayo ang emergency shutdown sa Tabango-Kananga 230kV Line 2 aron ayuhon ang depektiso nga equipment.
Ang Red Alert ipagawas kung dili igo ang power supply para sa panginahanglan sa mga konsumidor ug kinahanglanon sa transmission grid, samtang Yellow Alert kung kulang ang operating margin para sa contingency requirement.
I via Renante Socia Lada