Nagpahigayon og case conference ug diyalogo ang kapulisan sa Sawang Calero Police Station uban ang Department of Social Welfare and Services (DSWS) ug mga opisyal sa barangay human mag-viral ang usa ka video nga nagpakita sa 12 ka menor de edad nga nagtinabangay og sumbag ug sikad sa usa ka 21-anyos nga lalaki sa Barangay Calamba, Cebu City.
Ang hitabo nahitabo alas-4 sa kadlawon niadtong Agosto 9, 2025 sa Mahayahay 1, Brgy. Calamba. Ang biktima usa ka residente sa lugar ug miyembro sa usa ka inilang grupo. Sumala sa pamahayag sa mga menor de edad nga nakuha sa video, nagsugod ang gubot human nasayop og ila ang biktima nga sila maoy nambato niya, hinungdan nga nasuko kini ug gidumog sa grupo.
Sa meeting, nitambong ang biktima, ang 12 ka menor de edad uban sa ilang ginikanan o guardians, mga personnel sa GAD sa duha ka barangay, ug kinatawan sa DSWS nga gipangulohan ni Sir Aldrin Zamora, RSW. Gihisgutan dinhi ang hustong pagpahigayon sa diversion program para sa mga menor de edad ug ang posibilidad sa pagsaka og kaso depende sa resulta sa imbestigasyon. Gipahimug-atan usab ang papel sa mga ginikanan sa pagbantay ug paggiya sa ilang mga anak aron malikayan ang susamang insidente.
Si PBGen Redrico A. Maranan, Regional Director sa PRO7, mipahimangno nga ang kabatan-onan repleksyon sa pag-atiman ug pagtudlo sa ginikanan. Gi-awhag usab niya ang komunidad nga magtinabangay ug dili mahadlok pagtawag sa 911 sa tanang emerhensiya aron masiguro ang paspas nga aksyon sa kapulisan.
Source: PRO7
I via Renante Socia Lada