Gipangayo ni Cebu City Vice Mayor Tommy Osmeña ang mas hugot ug 24-oras nga pagpatuman sa Anti-Noise Ordinance sa Cebu City tungod sa nagkadaghan nga reklamo sa mga residente bahin sa kasaba, ilabi na sa karaoke ug mga tapok sa kagabhion.
Matud pa sa bise mayor, daghan ang naapektuhan sa kasaba lakip na ang mga work-from-home workers ug mga estudyante nga nagkinahanglan og hilom nga palibot alang sa trabaho ug pagtuon. Apan padayon gihapon ang problema tungod sa dili patas nga pagpatuman sa balaod sa lebel sa barangay.
Gipasabot ni Osmeña nga kinahanglan manubag ang mga barangay officials kung mapadayon ang reklamo sa ilang lugar. Lakip sa iyang gisugyot ang ₱500 nga multa matag opisyal kung mapamatud-an nga walay aksyon batok sa kasaba.
Dugang pa niya, dili tugotan nga mahimong normal ang sobra nga kasaba labi na sa kagabhion, kay klaro nga gilapas niini ang katungod sa katawhan sa pahulay ug kalinaw sa ilang panimalay.
Sa dili pa ipatuman ang mas hugot nga lakang, planong magpahigayon og public hearings ang lokal nga kagamhanan aron mapaminaw ang tanang sektor ug masiguro nga patas ug makiangayon ang pagpatuman sa Anti-Noise Ordinance sa siyudad.
📸 VM Tommy Osmeña
I via Renante Socia Lada