Usa ka suspetsado patay samtang ang iyang kauban nadakpan human sa usa ka enkwentro batok sa kapulisan sa Purok 8, Barangay Bunga, Toledo City, kagahapon sa hapon, Marso 4, 2025.
Ang napusilan sa maong operasyon mao si Jamil Padua, alyas “Janjan,” nga gikatahong nalambigit sa pagpamusil nga miresulta sa pagkamatay ni Joshua Alferez, 28-anyos.
Base sa testimonya sa mga saksi, si Janjan ug iyang mga kauban maoy responsable sa krimen. Sa dihang gisulayan sa kapulisan sa pagdakop, misukol si Janjan ug nakigpinusilay. Naigo kini ug dali nga gidala sa tambalanan, apan gideklarar nga dead on arrival.
Samtang, usa pa ka suspetsado nga giilang si Jerome Villarmia Padua, 35-anyos, nadakpan atol sa operasyon.
Narekober sa crime scene ang usa ka .45 caliber pistol nga adunay tulo ka basiyo sa bala, nga gituohang gigamit sa krimen.
Samtang, gikan kang Jerome Padua, nakuha ang usa ka .38 caliber revolver nga adunay tulo ka buhing bala.
Padayon pang ginasusi sa kapulisan ang insidente aron matino ang motibo sa maong krimen.
📸 CTTO
I via Renante Socia Lada