Nikalas gyud og usa ka kinabuhi ug niangol sa laing tawo ang pagdasmag sa tricycle.
Pasado alas 8:10 kagabii, Novembre 5,2022, didto sa Purok Poland Proper, Barangay Libertad, dakbayan sa Bogo.
Ang namatay giila sa kapulisan sa Bogo City Police Station nga si Danilo Lequin Casiano, 71 anyos ang panuigon, ulitawo, nagpuyo rapud sa maong lugar.
Naila usab ang mga nangaangol nga sila si Isce Villar Villordon, 19 anyos ang pangidaron, nagpuyo sa Purok Portugal, Barangay Libertad, sa mao rang Dakbayan.
Ang suspetsado nga driver giila usab nga si Giovanne Catadman Aragon, 35 anyos ang panuigon, may kaipon, nagpuyo sa Barangay Odlot sa susamang Siyudad.
Sa imbestigasyon nga gihimo ni PSSG Commendador sa Bogo City Traffic Unit nasayran pinaagi usab sa saksi sa maong panghitabo nga sa maong lugar ug oras nag lakaw daplin sa karsada ang mga biktima sa dihang gi dasmagan ug na ligsan si Casiano.
Gisulayan unta pagdala sa tambalanan si Casiano apan nabugtuan kini sa iyang kinabuhi.
Dugang ni PSSG Commendador nga gituhuang ubos sa ilimnong makahubog ang driver sa trycycle nga posibling maoy hinungdan nga nawad-an kini sa iyang kontrol og naka dasmag.
Sa pagkakaron padayong gitanggong ang suspetsado samtang gihuwat pa ang habig sa mga biktima. (Renante Lada, photo courtesy of Bogo City Police Station)