Nikutlo og usa ka kinabuhi ug niangol ang nahitabong disgrasya sa kadalanan didto sa Barangay Paknaan, Dakbayan sa Mandaue, kaganihang kadlawon, Marso 3,2023.
Ang nakalas giila sa Traffic Enforcement Unit sa MCPO nga mao si James Carlo Tongco, 21 anyos ang panuigon, tinun-an sa UCLM sa kursong Mechanical Engineering, kasamtangang nagpuyo sa Barangay Pusok ug lumad nga taga isla sa Olanggo, Dakbayan sa Lapu-Lapu.
Naila usab ang naangol nga mao si Carl Balonos 20 anyos, klasmate sa namatay, taga Zone Gabii, Barangay Paknaan, Siyudad sa Mandaue.
Samtang ang driver sa L300 nga gikabangga naila usab nga mao si Rance Asilo 21 anyos ang pangidaron, taga lungsod sa Compostela.
Sa imbestigasyon nga gihimo ni Police Corporal Darwin Cempron ang Traffic investigator sa Traffic Enforcement Unit sa MCPO nasayran nga nagka bangga ang motorsiklo ug L300 cargo van nga niresulta sa kamatayon sa tinun-an.
Nasayran usab nga gikan nag inum ang mga biktima didto sa lungsod sa Consolacion isip pagselebrar human sa ilang examination.
Sa pagkakaron gihimo pa ang dugang imbestigasyon may labot sa maing aksidenti nga nikutlo ug usa ka kinabuhi. (Renante Lada)