Cebu City- Gipang deploy sa upat ka mga nagkalain-laing lugar ang mga kapolisan ug anti-ordinance authorities sa syudad sa Sugbo, human sa sunod sunod nga giingong bomb threat.
Gikonpirma sa Mabolo Police Station, Hwebes, Mayo 26, 2022 nga duna silay gi-verify nga bomb threats sa Qimonda Building, Cebu City Hall, Carbon Public Market, ug hasta ang Cebu-Cordova Link Expressway (CCLEX).
Matod ni Capt. Renz Talosig, hepe sa Mabolo Police Station nga una silang nakadawat ug information ala 1:57 kagahapon sa hapon, gikan sa mga trabahante sa Qimonda nga usa kanila nakadawat ug mensahi nga nagkanayon nga dunay bomba nga gibutang sa nahisgutang building.
Hinungdan niini, gipa suspenso ang trabaho sa Cebu City Hall of Justice gikan sa ala 1:30 sa hapon ngadto sa ala 5 sa hapon sa tanang trial courts nga naa sa sulod.
Kini maoy ikaduhang higayon nga ang Qimonda naka dawat ug bomb threat.
Kahinumduman nga niadtong Marso, gipahunong sab ang trabaho sa City Hall of Justice human gipa gawas ang mga tawo gumikan sa nahisgutang bomb threat.
Gawas sa Qimonda Building, gibutyag ni Talosig nga naka dawat sab ug bomb threat ang Cebu City Hall, Carbon Public Market ug CCLEX.
Pasado alas 3 sa hapon, nagpabilin pa ang mga otoridad ug law enforcement agencies sa lugar pagsuta sa posibling nahimutangan sa bomba.
l via Jhon Tadlip
Source/Photo: Mabolo Police Station
