Unom (6) ka wanted person ang nadakpan sa gipahigayon nga intensified manhunt operation sa Tracker Team sa Toledo City Police Station (CPS). Ang mga suspek giingong may kalabutan sa lain-laing kaso sama sa Frustrated Homicide, Violation of Section 5, Article II of R.A. 9165 (Comprehensive Dangerous Drugs Act of 2002), Grave Oral Defamation, ug Paglapas sa Section 22 sa R.A. 11199 (Social Security Act of 2018).
Sumala ni PLTCOL Rolando H. Barraquio, hepe sa Toledo CPS, kini nga operasyon resulta sa walay hunong nga pagpaningkamot sa kapulisan ug sa ilang hugot nga koordinasyon sa komunidad aron mapadayon ang kalinaw ug kahapsay sa siyudad.
Gipasabot ni Barraquio nga ang ilang manhunt operation kabahin sa padayon nga kampanya sa Philippine National Police (PNP) batok sa mga nagtago nga kriminal ug mga indibidwal nga adunay mga kaso. Ang ilang paningkamot nagpakita sa determinasyon sa PNP Toledo nga mapatuman ang balaod ug mahatagan hustisya ang mga biktima.
“Dili nato masustiner ang kalinaw ug kahapsay kung wala ang suporta sa katawhan. Mag-uban kita pinaagi sa Bagong PNP para sa Bagong Pilipinas aron masiguro nga ang hustisya moabot sa matag suok sa Toledo City,” matud pa ni Barraquio.
Ang Toledo City Police nagpasalig nga magpadayon ang operasyon batok sa mga wanted person aron mapugngan ang kriminalidad ug maprotektahan ang katawhan. Gidani usab nila ang publiko nga magpadayon sa pakigtambayayong sa kapulisan pinaagi sa pagsumbong sa mga kadudahang kalihokan sa ilang komunidad.
Source: Toledo PS
I via Renante Socia Lada