Giandam karon sa Cebu City Police Office (CCPO) ubos sa pagdumala ni PCOL Enrico Evangelista Figueroa, Acting City Director, ang tanang lakang sa seguridad alang sa pagsaulog sa All Saints’ ug All Souls’ Days (Undas 2025). Gipatuman ang mas hugot nga pagbantay ug gipahimutang ang tibuok dakbayan ubos sa heightened security alert status aron masiguro ang kalinaw ug kahapsay sa panahon sa pagbisita sa mga minahal sa kinabuhi.
Tungod kay adunay kapin sa 21 ka sementeryo sa siyudad, gikan sa sentro hangtod sa kabaryohan, gipadaghan sa CCPO ang mga pulis nga magroving ug magbantay sa mga dapit nga daghang tawo. Kapin sa 1,000 ka personahe sa PRO7, uban sa mga ahensya sa balaod, mga volunteer ug force multipliers, ang gideploy sa nagkalain-laing bahin sa Cebu City.
Matod ni PCOL Figueroa, andam na ang tanan nilang pwersa ug kagamitan alang sa kaluwasan sa katawhan.
Kaganihang buntag, gihimo usab ang inspection sa tanang sementeryo aron masiguro ang disiplina, kaandam, ug operasyon sa mga deployed personnel. Nakapahimulos usab ang CCPO sa maayong koordinasyon uban sa Cebu City Disaster Risk Reduction and Management Office (CCDRRMO) ug uban pang kaabag nga ahensya.
Gihangyo sa CCPO ang publiko nga siguraduhon nga luwas ang ilang panimalay sa dili pa mobiya, ug dayon nga ipahibalo sa Police Assistance Desk o sa opisyal nga CCPO hotlines kung adunay makita nga kadudahang lihok. Pinaagi sa disiplina ug kooperasyon, gilauman sa kapulisan nga magpabilin ang Cebu City nga malinawon ug luwas karong Undas 2025.
Source: CCPO
I via Renante Socia Lada