Usa ka bag-ong kasaysayan sa emergency response ang natala sa probinsya sa Cebu human ilusad sa Provincial Government of Cebu, ubos sa liderato ni Governor Pamela S. Baricuatro, ang una nga Sea Ambulance sa Kapitolyo. Kini nga proyekto nagtinguha nga mapaayo ang paspas ug episyente nga pagresponde sa emerhensya, ilabina sa mga isla ug lagyong mga lugar sa probinsya.
Ang maong inobatibong proyekto, pinaagi sa Provincial Disaster Risk Reduction and Management Office (PDRRMO), nagpakita sa lig-ong paningkamot ni Gobernadora Baricuatro nga mahatagan ug madalikyat nga serbisyo medikal ug rescue operations ang tanan nga Sugbuanon, bisan asa pa sila nagpuyo.
Pinaagi sa Sea Ambulance, mas dali na karon nga madala sa ospital ang mga pasyente ug biktima gikan sa mga isla, aron makadawat sila dayon ug medikal nga tabang. Kini nagpatuman sa saad sa gobernador nga walay Sugbuanon nga mapasagdan sa panahon sa emerhensya.
Dugang pa, gihatagan usab sa Bureau of Fisheries and Aquatic Resources (BFAR) ang Kapitolyo ug duha ka fishing boats, nga gihatag dayon sa mga lokal nga panggamhanan sa Danao City ug Medellin. Kini nga proyekto usa ka bahin sa padayong programa sa probinsya aron matabangan ang mga mananagat nga makabawi sa panginabuhian ug mapaayo ang resilience sa baybayon nga komunidad.
Ang mga kalihokan nga sama niini nagpakita sa tumong ni Governor Baricuatro nga lig-onon ang kaluwasan, kahimsog, ug panginabuhian sa mga Sugbuanon — usa ka lakang padulong sa mas lig-on ug mas andam nga Sugbo.
Source: Cebu Province PIO
I via Renante Socia Lada
Renante