Gipasidunggan sa Police Regional Office 7 (PRO7) ang suporta ug pagsalig sa publiko isip dakong kabahin sa ilang malampusong operasyon batok sa iligal nga armas, diin 1,502 ka loose firearms ang nasakmit gikan sa Enero 1 hangtod Mayo 31, 2025.
Sa maong lima ka bulan nga kampanya, 1,469 ka operasyon ang gipahigayon nga miresulta sa pagdakop sa 641 ka indibidwal ug sa pagkumpiskar sa 1,502 ka armas, lakip na ang 45 ka eksplosibo ug 3,294 ka mga bala.
Ubos sa liderato ni PBGEN Redrico A. Maranan, Regional Director sa PRO7, mapadayonon ang paningkamot sa kapulisan sa pagsumpo sa pagpanghupot og armas nga walay lisensya ug aron mapalig-on ang kahapsay ug seguridad sa rehiyon.
Usa sa mga nag-unang lakang sa maong kampanya mao ang Oplan Katok, usa ka inisyatiboa nga nag-awhag sa mga tag-iya sa armas nga nahunong ang lisensya nga boluntaryo nga isurender o i-renew ang ilang armas. Pinaagi sa 676 ka operasyon ubos sa Oplan Katok, 710 ka armas ang nakolekta nga walay kasamok.
Gipasabot ni PBGEN Maranan nga ang kalampusan sa PRO7 dili lamang bunga sa ilang paningkamot, kondili bunga usab sa growing trust and cooperation sa mga katawhan sa Central Visayas.
Ang kampanya batok sa iligal nga armas kabahin sa mas lapad nga estratehiya sa PRO7 aron mapakunhod ang krimen sa rehiyon, uban sa mga operasyon batok sa ilegal drogas, mga wanted persons, ug uban pang krimen.
Padayon ang panawagan sa PRO7 nga magpabilin ang pagbantay sa katawhan ug ang kooperasyon, aron walay lugar sa Central Visayas nga mahimong taguanan sa mga iligal nga armas o kasamok.
Source: PRO7
I via Renante Socia Lada