Tulo ka giilang Top Most Wanted Persons sa rehiyon ug probinsya ang nadakpan sa Police Regional Office 7 sa lain-laing operasyon sa Cebu niadtong Agosto 11, 2025, uban sa tabang sa nagkadaiyang yunit sa kapulisan ug mga national operatives.
Sa Madridejos, Cebu, unang nadakpan ang usa ka 36-anyos nga lalaki nga apil sa Top 5 Most Wanted sa rehiyon. Gi-atubang niya ang kaso nga Murder nga adunay silot nga reclusion perpetua o tibuok kinabuhi nga pagkabilanggo kon mapamatud-an nga siya ang suspek. Walay gi-set nga piyansa alang kaniya.
Sa Danao City, gisikop usab ang usa ka lalaki nga apil sa Top Most Wanted sa rehiyon tungod sa kaso nga Sexual Assault ubos sa R.A. 7610. Ang iyang kaso adunay silot nga prision mayor o unom hangtod 12 ka tuig nga pagkabilanggo, ug adunay piyansa nga ₱180,000.
Sa Mandaue City, nadakpan ang usa ka 36-anyos nga lalaki nga apil sa Top 10 Most Wanted sa probinsya tungod sa kaso nga Rape ubos sa Article 266-A sa Revised Penal Code. Sama sa unang suspek, wala usab kini’y gi-set nga piyansa. Giingon ni PBGen Redrico A. Maranan nga dili makalikay sa balaod ang bisan kinsa nga may sala ug magpadayon ang PRO7 sa pagpangdakop aron mapadayon ang kalinaw ug seguridad sa rehiyon.
Source: PRO7-PIO
I via Renante Socia Lada