Usa ka outing sa dagat sa mga estudyante sa Gelacio Babao High School ang nahimong trahedya human tulo sa ilang grupo ang nalumos sa dagat sa usa ka resort sa Barangay Tuyom, Carcar City niadtong Abril 21, 2025. Ang maong kalihokan gihimo aron selebrasyon sa adlaw nga natawhan sa ilang mga klasmeyt karong buwana.
Ang namatay giila nga si Mark Eian Peña Campaña, 16 anyos, taga Barangay Valladolid. Naluwas ang duha pa ka estudyante nga sila Jade Trinidad Alforque, 18, ug alyas Kim, 16, nga pareho usab taga Carcar City. Sila mga Grade 11 students nga miadto sa resort pasado alas-10 sa buntag ug miabang og cottage.
Sumala sa imbestigasyon, nangaligo ang tulo sa dagat nga mga 300 metros ang gilay-on gikan sa baybayon. Gibadlong pa kini sa ilang kauban nga si Berna Nacua nga ayaw adto sa lawom kay kantilado ang lugar ug walay life guard, apan wala kini gituman. Nasayran usab nga dili sila kahibalo molangoy.
Mitabang ang mga mananagat ug Philippine Coast Guard sa pagluwas kanila ug gidala dayon sa tambalanan. Apan si Campaña gideklarar nga patay pag-abot sa ospital. Ang kapulisan padayon pa sa imbestigasyon kalabot sa maong insedente.
📸 CTTO
I via Renante Socia Lada