Giandam na karon sa Cebu City Prosecutor’s Office ang kasong pagpanulis sa tulo ka mga suspetsado nga nalambigit sa pagpanulis sa DGC D’ Gold Chain Jewelry Store ug Macy Gold niadtong Agosto 8, 2024.
Sa ulahing kalambuan sa maong pagpanulis ang kapulisan sa Cebu City Police Office (CCPO) aduna nay tulo ka mga suspetsado.
Kana maoy gibutyag ni CCPO Acting Director Antonietto Cañete ug Station 5 Commander Police Major Philip John Libres ngadto ni Cebu City Acting Mayor Raymond Alvin Garcia.
Mahinomduman nga dungang gitulis ang maong Jewelry Pawnshop didto sa Calderon Street, Barangay Ermita sa dili mominos 6 ka mga lalaki na pulos armado nga luwan sa 3 ka mga motorsiklo. Nadala sa maong mga tulisan ang dili mominos P14 milyones nga balor sa mga alahas.
Sa pagkakaron nagpadayon ang pagpatuman sa “Oplan Universe” aron pagsikop sa mga suspetsado. (Renante Lada)