Nadakpan sa checkpoint operation sa Tudela Municipal Police Station ang usa ka delivery truck nga nagkarga og liboan ka LPG canisters nga walay klarong permit gikan sa Department of Energy (DOE) niadtong Pebrero 25, 2026.
Gipahigayon ang checkpoint sa Barangay Southern Poblacion, Tudela, Cebu. Gipara sa mga pulis ang puti nga aluminum van truck alang sa inspeksyon. Ang sakyanan narehistro ubos sa ngalan nga “Daisy” nga taga Banilad, Cebu City, ug gimaneho ni alyas “Rodel,” residente sa Marigondon, Lapu-Lapu City, nga nagtrabaho isip driver.
Sa pag-verify sa mga dokumento, nasuta nga nagkarga ang truck og LPG cylinders ug butane canisters nga walay klaro nga permit ug sertipikasyon gikan sa DOE. Kini supak sa Republic Act No. 11592 o ang LPG Industry Regulation Act of 2021, nga naglatid sa mga regulasyon sa luwas nga pagbiyahe sa LPG.
Sa imbentaryo nga gihimo sa mga pulis, nadiskubre ang 152 ka kahon nga adunay 6,096 ka puno nga tin can butane canisters ug 62 ka kahon nga adunay 2,480 ka bakanteng aluminum butane canisters. Ang kinatibuk-ang balor sa mga nasakmit nga produkto mokabat og ₱133,760.
Gidala ang sakyanan ug ang mga kargamento sa estasyon sa kapolisan sa Tudela alang sa hustong dokumentasyon ug disposisyon. Giandam na ang kaso batok sa driver samtang nagpadayon ang imbestigasyon aron mahibaluan kung adunay lain pang mga responsable niini nga insidente.
Ang kapolisan nagpasidaan nga padayon nilang palig-onon ang checkpoint operations aron masiguro ang kaluwasan sa publiko batok sa peligro nga dala sa ilegal nga pagpalusot og delikadong materyales.
Source: CPPO
I via Renante Socia Lada