Aron masiguro ang kaluwasan ug kahapsay sa trapik sa Sinulog Grand Parade, magpatuman og truck ban ang dakbayan sa Cebu karong Domingo, Enero 18, 2026.
Gilauman nga daghang tawo ug sakyanan nga motambong sa pinakadakong kalihokan sa pista.
Giaprobahan ni Mayor Nestor Archival, base sa rekomendasyon sa Cebu City Traffic Management Coordination (TMC) Board, ang pagdili sa paglabay sa mga trak, trailer, ug delivery van nga molapas og 6,500 kilo ang kabug-aton. Epektibo kini gikan 12:01 sa kadlawon hangtod 9:00 sa gabii sa maong adlaw.
Sakop sa truck ban ang Cebu South Coastal Road (CSCR) sa South Road Properties gikan sa boundary sa Cebu City ug Talisay City padulong sa Plaza Independencia, lakip na ang Sen. Sergio V. Osmeña Avenue. Apil usab ang tibuok Natalio B. Bacalso Avenue gikan Barangay Bulacao hangtod sa Sen. Mariano Jesus D. Cuenco Avenue.
Sumala sa mga opisyal sa siyudad, tumong sa lakang nga mamenosan ang trapik, malikayan ang aksidente, ug masiguro ang hapsay nga pag-agi sa emergency ug essential services atol sa mga nag-unang kalihokan sa Sinulog.
Apan adunay mga sakyanan nga exempted sa truck ban sama sa garbage trucks, fire trucks, sakyanan sa gobyerno, ug service vehicles sa VECO, PLDT, MCWD, ug NGCP. Gitambagan ang mga apektadong motorista ug trucking companies nga mag-andam ug magplano daan sa ilang byahe aron malikayan ang kalangay sa maong adlaw.
Source: CCTO
I via Renante Socia Lada