Nadakpan ang tulo ka mga tawo nga sakop sa listahan sa Top Regional Most Wanted Persons sa Police Regional Office 7 (PRO7) sa lain-laing lugar sa Lapu-Lapu City, Cebu City, ug Davao City, niadtong Agosto 6, 2025.
Sa Lapu-Lapu City, nasikop ang usa ka menor de edad nga lalaki nga giilang Top 7 Regional Most Wanted. Gipasanginlan siya nga nakalapas sa Sections 5 ug 11 sa R.A. 9165 o Comprehensive Dangerous Drugs Act of 2002. Wala siya’y piyansa sa kaso sa Section 5, samtang ₱200,000 ang piyansa sa Section 11. Gibutang siya karon sa kustodiya sa Police Station 3, Lapu-Lapu City.
Sa Barangay Kalunasan, Cebu City, nadakpan ang usa ka lalaki nga giilang Top 10 Regional Most Wanted samtang nagdetiner sa Cebu Provincial Detention and Rehabilitation Center (CPDRC). Nag-atubang siya sa duha ka kaso sa sexual assault ubos sa Section 5(b) sa R.A. 7610. Ang iyang total nga piyansa kay ₱180,000.
Sa Davao City, nadakpan usab ang usa ka lalaki nga giilang Top 2 Regional Most Wanted samtang anaa sa BJMP Davao City Jail-Male Dormitory. Nag-atubang siya sa kasong syndicated estafa, nga walay girekomendar nga piyansa. Ang iyang warrant of arrest gi-isyu sa Regional Trial Court Branch 52 sa Talibon, Bohol.
Gipasalig ni PRO7 Regional Director PBGEN Redrico A. Maranan ang kalampusan sa mga operasyon ug miingon, “Hindi kailanman makapagtatago ang mga may sala sa batas. Sa tulong ng maigting na koordinasyon at dedikasyon ng ating kapulisan, unti-unti nating naipatutupad ang hustisya para sa mga biktima.”
Padayon ang PRO-7 sa kampanya batok sa kriminalidad ug sa pagdakop sa mga pinangita sa balaod aron mapadayon ang kalinaw ug kahapsay sa rehiyon.
Source: PRO7
I via Renante Socia Lada
#rpndykccebu