Nadakpan sa usa ka joint operation sa kapulisan ang usa ka 38-anyos nga lalaki nga nailhan sa alyas “Jerald,” nga nalakip sa Top 6 Most Wanted Persons sa Central Visayas.
Nasikop siya sa Barangay Marbel, Kidapawan City, North Cotabato atol sa operasyon sa kapulisan karong adlawa. Ang pagdakop gibase sa warrant of arrest ubos sa RA 9165 o Comprehensive Dangerous Drugs Act of 2002, nga gipagawas ni Judge Jennifer Chavez Marcos sa RTC Branch 2, Tagbilaran City, Bohol kaniadtong Enero 29, 2025. Wala kini girekomendar nga piyansa.
Gidayeg ni PBGen Redrico A. Maranan, Regional Director sa PRO7, ang panaghiusa ug koordinasyon sa Panglao Municipal Police Station, Provincial Intelligence Unit, Tagbilaran City Police Station, ug PRO12 nga maoy nakaresulta sa kalampusan sa operasyon.
Ang suspetsado karon gibutang sa kustodiya sa Panglao MPS samtang naghulat sa presentasyon ngadto sa korte nga nagpagawas sa warrant.
Matud pa ni PBGen Maranan, pwede man managan ang kriminal, pero dili sila makatago sa PNP 7. Ang pagdakop karon nagpamatuod nga pinaagi sa intelihente ug hiniusang aksyon, makit-an ra gihapon sila bisan asa sila motago.
Source: PRO7 PIO
I via Renante Socia Lada