Nadakpan sa mga kapulisan ang usa ka 20 anyos nga lalaki nga nalista isip Top 4 Most Wanted Person sa probinsya ug Top 1 Most Wanted sa municipal level sa lungsod sa Catmon, Cebu niadtong nakalabay nga adlaw.
Ang suspetsado nga giila sa alyas nga “Paul,” ulitawo ug residente sa Sitio Saksak, Barangay Duyan, Catmon, gidakop mga alas 8:50 sa gabii pinaagi sa operasyo nga gipahigayon sa Intelligence Unit, Drug Enforcement Unit (DEU), ug Tracker Team sa Catmon Municipal Police Station.
Ang pagdakop gihimo base sa warrant of arrest nga gipagawas ni Judge Angeline T. Asdillo-Bascon sa Family Court, Branch 9 sa Danao City, Cebu. Ang kaso batok sa suspek mao ang tulo ka ihap sa qualified rape. Sumala sa kapulisan, ang maong kaso non-bailable o dili mahimong makagawas pinaagi sa piyansa.
Gikan sa intelligence-driven operation sa Tracker Team sa Catmon MPS ang pagkasikop sa suspetsado human matultolan ang iyang gipuy-an ug personal nga maserbisyohan ang warrant of arrest.
Sa pamahayag ni Abubakar Udang Mangelen Jr., Provincial Director sa Cebu Police Provincial Office, gidayeg niya ang mga operatiba sa ilang malampusong operasyon. Matod niya, nagpakita kini sa lig-on nga paningkamot sa kapulisan sa pagpanalipod sa komunidad, ilabi na sa kababayen-an ug kabataan batok sa mga bug-at nga krimen, ug sa pag-atubang sa mga naglikay sa hustisya.
Source: CPPO
I via Renante Socia Lada