Nasikop sa kapulisan ang usa ka giingong notoryos nga kawatan human sa hot pursuit operation nga gipahigayon sa Guadalupe Police Station 9 niadtong Pebrero 23, 2026 sa Sitio Baksan, Barangay Sapangdaku, Cebu City.
Ang operasyon gihimo sa Cebu City Police Office ubos sa pagpangulohan ni PCOL. George V. Ylanan, pinaagi sa mga pulis sa Guadalupe Police Station 9 nga gipangulohan ni PCAPT. Venstine P. Bontilao, uban sa koordinasyon sa mga Barangay Public Safety Officers sa Barangay Sapangdaku.
Ang suspek giila sa alyas nga “Juan,” 28 anyos ug residente sa maong lugar. Sumala sa report, niadtong Pebrero 22 mga alas 9 sa gabii, nasakpan sa CCTV sa usa ka residente ang suspek nga nagsulod sa iyang kabtangan ug nangawat og nagkadaiyang piyesa ug materyales sa ekipo.
Sa dihang gikompronta, misubat ang suspek. Lakip sa gikawat ang mga electrical wire ug piyesa sa backhoe ug dump truck nga nagkantidad og kapin sa ₱400,000. Nadiskubrehan usab ang dugang kadaot sa kagamitan nga nagkantidad og ₱15,500.
Tungod sa dali nga aksyon sa pulis, nasikop ang suspek pagkasunod adlaw mga alas 7 sa gabii. Karon, anaa na siya sa kustodiya sa Police Station 9 ug giandam na ang kasong theft ug malicious mischief batok kaniya.
Nagpasalig ang CCPO nga magpadayon sa pagpanalipod sa katawhan ug nag-awhag sa publiko nga dayong motaho sa bisan unsang kadudahang kalihokan aron mas mapalig-on ang kalinaw ug seguridad sa komunidad.
Source: CCPO
I via Renante Socia Lada