Nadakpan sa Tracker Team sa City of Talisay Police Station ang Top 2 Most Wanted Person sa municipal level niadtong Pebrero 26, 2026 sa Barangay Lawaan 2, Talisay City, Cebu.
Ang suspetsado nga giila sa alias nga “Paul”, 38-anyos, minyo, ug residente sa Barangay Jaclupan, Talisay City, gidakop base sa Warrant of Arrest tungod sa kasong Homicide ubos sa Article 249 sa Revised Penal Code. Ang warrant gi-isyu sa Regional Trial Court, 7th Judicial Region, Branch 66 sa Talisay City, nga adunay girekomendar nga piyansa nga ₱200,000.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang operating team sa ilang malampusong operasyon. Matod niya, kini nga kalampusan kabahin sa gipakusog nga kampanya batok sa mga wanted persons sa probinsya.
Gipasabot usab ni PCOL. Mangelen nga padayon ang kapulisan sa pagdakop sa mga indibidwal nga nag-atubang og kaso aron maatubang nila ang hustisya sa korte. Gipasiugda niya nga magpadayon ang kapulisan sa pagpaningkamot aron mapreserbar ang kalinaw, kahapsay, ug hustisya sa komunidad.
Source: CPPO
I via Renante Socia Lada