Gipasidunggan sa Police Regional Office 7 (PRO7) ang pipila ka mga opisyal ug personnel tungod sa talagsaong serbisyo atol sa Traditional Monday Flag Raising Ceremony sa Camp Sergio Osmeña Sr. sa Marso 2, 2026. Ang seremonya gipangulohan ni PBGen. Redrico A. Maranan, Regional Director sa PRO7.
Gihatag ang Medalya ng Kasanayan sa pipila ka commissioned officers tungod sa ilang dako nga kontribusyon nga nakatabang aron maangkon sa PRO7 ang pinakataas nga Unit Performance Evaluation Rating (UPER) tali sa tanang Police Regional Offices sa nasod gikan Abril hangtod Disyembre 2025.
Lakip sa mga gipasidunggan sila PCOL Isagani Fetizanan, PCOL Arnel Apud, PCOL Enrico Figueroa, PCOL Regie Real, PCOL Russel Maca, PCOL Lencio Baliguat Jr., PCOL Maribel Getigan, PCOL Kimberly Molitas, PCOL Rollyfer Capoquian, PCOL Jeffrey Caballes, PCOL Antonietto Cañete, PLTCOL Richard Oliver, ug PCOL Melbert Glade Esguerra.
Gihatag usab ang Medalya ng Kagalingan sa mga Provincial ug City Directors sa PRO7 tungod sa ilang malampusong kampanya batok sa ilegal nga sigarilyo. Gikan Enero 1 hangtod Pebrero 24, 2026, nakumpiskar ang mga peke ug smuggled nga sigarilyo nga nagkantidad og ₱170.4 milyon. Lakip sa mga awardees sila PCOL Agosto Daskeo, PCOL Abubakar Mangelen Jr., PCOL Cirilo Acosta Jr., PCOL George Ylanan, ug PCOL Patricio Degay Jr.
Gipasidunggan usab ang pipila ka personnel sa Regional Comptrollership Division 7 pinaagi sa Medalya ng Kasanayan tungod sa ilang taas nga performance rating nga 99.63 porsyento sa pag-submit og mga report ug initiatives, nga nakaangkon og unang pwesto sa tibuok nasod.
Samtang, si PBGen Maranan nakadawat usab sa Medalya ng Pambihirang Paglilingkod gikan sa Chief of the PNP nga si Jose Melencio C. Nartatez Jr., isip pag-ila sa iyang liderato sa seguridad atol sa Fiesta Señor ug Sinulog celebrations.
Gipasiugda ni Maranan nga ang kalampusan sa PRO7 bunga sa panaghiusa, disiplina, ug padayon nga paningkamot sa tanang personnel aron mapadayon ang kalinaw ug kahapsay sa rehiyon.
Source: PRO7 PIO
I via Renante Socia Lada