Nadakpan sa kapulisan ang Top 1 Most Wanted Person (Municipal Level) sa MacArthur Municipal Police Station, Abuyog, Leyte niadtong Enero 27, 2026 sa Brgy. South Poblacion, City of Naga, Cebu.
Ang suspetsado nga nailhan sa alyas “Jerome”, walay trabaho ug kasamtangang nagpuyo sa Brgy. Naalad, Naga City, nadakpan sa Intelligence/DEU/Tracker Team sa Naga City Police Station atol sa usa ka intelihensiya nga operasyon.
Gipatuman sa kapulisan ang Warrant of Arrest nga giisyu sa Regional Trial Court, Branch 10 sa Abuyog, Leyte tungod sa paglapas sa Sections 5 ug 11, Article II sa RA 9165 o ang Comprehensive Dangerous Drugs Act of 2002. Gi-atubang sa suspetsado ang kaso sa ilegal nga pagbaligya sa delikadong drogas (walay piyansa) ug ilegal nga pagpanag-iya sa delikadong drogas, nga adunay rekomendar nga piyansa nga ₱200,000 para sa ikaduhang kaso.
Sumala sa imbestigasyon, naglikay sa pagdakop ang suspetsado human maapil sa usa ka drug operation sa Leyte ug mi-eskapo paingon sa Cebu. Una siyang nadakpan atol sa buy-bust operation sa Brgy. South Poblacion, Naga City, diin nakumpirma pinaagi sa E-Warrant System nga adunay siyay outstanding nga warrant.
Matud ni PCOL Abubakar Udang Mangelen Jr., Provincial Director sa Cebu Police Provincial Office (CPPO), ang kalampusan sa operasyon nagpakita sa padayon ug hugot nga paningkamot sa kapulisan sa pagdakop sa mga wanted person, ilabi na kadtong nalambigit sa ilegal nga drogas.
Dugang pa niya, magpadayon ang CPPO sa operasyon aron masiguro ang kaluwasan sa komunidad. Ang operasyon kabahin sa gipalig-on nga kampanya sa PNP batok sa mga wanted person ug ilegal nga drogas ilawom sa direktiba sa PRO7.
Source: CPPO
I via Renante Socia Lada