Nadakpan sa kapulisan ang Top 1 Most Wanted Person sa lebel sa rehiyon, probinsya, ug munisipyo sa operasyon nga gihimo sa Sitio Capareda, Barangay Acmonan, Tupi, South Cotabato niadtong nakalabay nga adlaw.
Ang operasyon gipanguluhan sa Cebu Police Provincial Office (CPPO) pinaagi sa City of Talisay Police Station uban sa tabang sa ubang mga yunit sa kapulisan.
Ang suspek gidakop pinaagi sa Warrant of Arrest alang sa kasong murder ubos sa Article 248 sa Revised Penal Code. Ang maong warrant gi-isyu sa Regional Trial Court Branch 66 sa Talisay City, Cebu, ug walay piyansa nga gitugot.
Human sa pagdakop, gipahibalo ang suspek sa kasong iyang giatubang ug sa iyang mga katungod sumala sa Miranda Doctrine.
Gipasidunggan ni CPPO Provincial Director PCOL Abubakar Udang Mangelen Jr. ang mga operatiba sa ilang malampusong operasyon.
Matod niya, nagpakita kini sa epektibong paniid ug lig-on nga panagtinabangay sa mga ahensya sa gobyerno. Gipasiugda usab niya nga padayon nilang pangitaon ug dakpon ang mga wanted person bisan asa pa kini manago aron maatubang ang hustisya.
Padayon usab ang CPPO sa pagpalig-on sa ilang kampanya batok sa mga wanted person aron masiguro ang kalinaw ug kaluwasan sa komunidad.
I via Renante Socia Lada