Hilak ug pag bakho ang gibati sa mga ginikanan human nila nakita nga ang ilang anak walay nay kinabuhi ug hubo nga napalgan sa kasagbutan.
Pasado alas 6:00 kaganihang buntag, Agusto 25, 2023, napalgan kini didto sa Barangay Bunga, siyudad sa Toledo, probinsya sa Sugbo.
Ang biktima giila sa Toledo Police Station nga mao si Sharmaine Flores, 17 anyos ang panuigon, grade 12 sa pribado nga tunghaan sa maong Siyudad.
Sa pasiunang inbestigasyon sa Toledo City Police Station nasayran nga ang biktima nigawas kagabii aron magpaload sa iyang cellphone apan wala na kini nibalik pa.
Kumpyansa ang pamilya sa biktima nga nilahos lang kini sa iyang gi trabahuan nga Madre isip part-time worker.
Si Flores bugtong babaye sa 7 ka mga magsuon.
Ang kapulisan karon sa Cebu Police Provincial Office (CPPO) nimando na og manhunt operation aron pagsikop sa nibuhat sa niluog nga pagpatay sa tinun-an.
Ila usab palawman kung unsay motibo sa maong krimin. (Renante Lada, photo courtesy of Toledo City Police Station)