Sa press conference kagahapong adlawa, Hulyo 15, 2024, Giklaro ni Acting Cebu City Mayor Raymond Alvin Garcia nga bisan libre man tuod sa publiko ang pagtan-aw sa closing ceremony sa Palarong Pambansa 2024, gikinahanglan gihapon ang tiket aron makasulod.
Matod pa nga ang ticket magagikan sa Kagamhanan sa Dakbayan sa Sugbo, apan ang katunga niini gikan sa Probinsiya sa Sugbo, isip maoy sponsor sa closing ceremony.
Ugma na kining adlawa Hulyo 16, 2024 didto sa Cebu City Sports Center (CCSC).
“Kita gyuy mohatag kay ato manang event, kita may host. But, off course, I will give a portion to the Provincial Government kay I’m sure they would also want to invite the mayors of different cities and minicipalities of Cebu province, as well as mga Capitol employees tingali. Sila nalay bahala,” pulong sa acting mayor atol sa press conference kaganihang buntag.
Isip sponsor, ang Kapitolyo nihatag og P8 milyones alang sa closing ceremony, nga gitagna nga mas engrande ug sadya unya itandi sa opening ceremony niadtong Hulyo 9.
Sa laing bahin, kabahin sa kompirmasyon sa pagtambong ni Bise Presidente Sara Duterte sa closing ceremony, gibutyag niya nga duha na ka adlaw nga ang Vice President Security Group (VPSG) ug ang protocol sa Vice President’s Office niadto sa CCSC aron sa pag- inspeksyon niini.
“If that is an indication nga motungha siya, motunga gyud tingali. But there is no confirmation sa akoang end nga motunga siya,” sulti ni Acting Mayor Garcia. (Renante Socia Lada)