Nakigtambayayong ang Traffic Enforcement Agency of Mandaue (TEAM) ug ang Lapu-Lapu City Traffic Management System (CTMS) aron masulbad ang grabe nga trapiko sa Sergio Osmeña Bridge (1st bridge) ug Marcelo Fernan Bridge (2nd bridge). Kini human sa miting nga gipahigayon sa Metro Cebu Bridge Management Board (MCBMB).
Sumala ni Hyll Retuya, head sa TEAM, kasagaran bumper-to-bumper ang trapiko gikan sa U.N. Avenue padulong sa 2nd Bridge ug gikan sa A.C. Cortes Avenue padulong sa 1st Bridge, ilabina sa peak hours. Usa sa nagpalangan sa trapiko mao ang ongoing road scraping sa U.N. Avenue.
Sa laing bahin, andam usab ang Lapu-Lapu City nga motabang sa pagplano ug pagpatuman sa mga lakang aron hapsay ang mosulod ug mogawas nga mga sakyanan sa duha ka tulay. Si Gov. Pam Baricuatro mipasabot nga gipadali na sa DPWH-7 ang pagtrabaho sa kalsada padulong sa Marcelo Fernan Bridge, nga usa ka hinungdan sa grabeng trapiko sa dapit.
Si Mandaue City Councilor Atty. Joel Seno mitambag sa MCBMB sa pagpatuman og klaro nga traffic scheme aron malikayan ang pagpundo sa mga sakyanan sa Sergio Osmeña Bridge. Giuyonan usab kini sa Vice Chairman sa MCBMB, Engr. Pericles Dakay, uban sa mga ahensya sa gobyerno ug LGUs, aron makab-ot ang mas hapsay ug luwas nga trapiko sa mga tulay sa Mactan.
📸 Mandaue City PIO
I via Renante Socia Lada