Usa ka Maayong balita alang sa tibuok Camotes Group of Islands kay nagsugod na ang pagtukod sa Camotes Island Airport Terminal nga nahimutang sa lungsod sa San Francisco, niining adlawa, Disyembre 10, 2024 uban ang inisyal nga budget gikan sa nasodnong kagamhanan nga nagkantidad og P115.7 milyon.
Nitambong sa maong okasyon si Gobernador Gwen Garcia ug ang ikalima nga distrito nga Kongresista ug Deputy Speaker Duke Frasco, kauban silang Board Members Mike Villamor, Red Duterte, ug Glenn Soco.
Apil usab sa kalipay sa seremonya ang upat ka mga mayor sa Camotes: San Francisco Mayor Al Arquillano Jr.; Poro Mayor Gary Rama; Tudela Mayor Jojo Solante; ug Pilar Mayor Manuel Santiago, nga nagtimaan sa pag-uswag ug kalambuan alang sa Camotes.
Ang Camotes Island Airport nahimutang sa usa ka 27-ka ektaryang yuta nga gipanag-iya sa Probinsya sa Sugbo, ug padayon ang negosasyon aron mapalapdan ang lugar sa airport, ilabi na ang runway niini.
Sa higayon nga mahuman ug mag-operate, ang airport maka-accommodate og mga pribado ug pampasaherong eroplano nga makadala og 70 hangtod 80 ka tawo.
Ang maong proyekto nagdala ug dako nga kaayohan sa katawhan sa Camotes—pagduso sa turismo, paghimo og trabaho, paghatag og panginabuhi, ug pag-abli og bag-ong oportunidad sa ekonomiya alang sa mga isla.
Ang Kapitolyo ug ang Mactan Cebu International Airport Authority padayon usab sa ilang panaghisgot bahin sa pagdumala sa airport.
Gihimo ni DS Frasco ang balaod nga nagtukod sa Camotes Island Domestic Airport niadtong 2019, nga napamatud-an ug naduso kaniadtong 2021. Nakaseguro usab siya og inisyal nga pondo nga nagkantidad og P265 milyon alang sa pagtukod sa runway.
Samtang ang DOTr maoy mohimo sa runway, ang DPWH maoy mohimong terminal sa airport.
Source: Cebu Provincial Capitol, PIO
I via Renante Socia Lada
#rpndykccebu
#675hzamband
#mrpublicservice