Si Mayor Raymond Alvin Garcia nipasalig sa mga senior citizen nga sugod Enero 2025, maghatag ang dakbayan og libre nga maintenance medicine alang kanila. Kini nga programa gidawat og dakong kalipay sa mga senior citizens, ilabina kadtong nagtapok sa Brgy. Cogon Pardo kagahapong adlawa, Disyembre 10, 2024.
Lakip usab sa ilang gipasalamatan mao ang hinabang pinansiyal nga P3,000 nga gipanghatag sa Department of Social Welfare and Development (DSWD) ilawom sa Social Pension Program for Indigent Senior Citizens (SPISC).
Matod sa Mayor nga karong Enero, ihatag na pagbalik ang libreng maintenance medicine sa tanang senior citizens. Dili lang ni usa ka semana o usa ka bulan, tibuok tuig 2025 mohatag og maintenance medicine, 365 days ang kagamhanan sa siyudad sa Sugbo.
Gawas sa tambal, gipadali usab ni Mayor Garcia ang paghatag sa P1,000 nga cash assistance. Sa una, kada katapusan sa ikatulong buwan ihatag ang tulo ka buwang ayuda nga P3,000. Apan karon, gipasiguro ni Mayor Garcia nga mahatag kini sa una pa lang semana sa ikatulong buwan.
Ang maong mga programa alang sa mga senior citizens gilauman nga makatabang ug makapadali sa ilang panginabuhi, ug usa ka pamaagi sa pagpasalamat sa ilang kontribusyon sa komunidad.
Source: Cebu City PIOI via Renante Socia Lada