Gitugotan na sa Local Toll Regulatory Council (LTRC) ang bag-ong rate sa toll fee para sa mga sakyanan nga mogamit sa Cebu-Cordova Link Expressway (CCLEX). Sugod Hulyo 1, 2025, ipatuman na ang provisional discounted rate samtang ang tibuok aprubadong rate sundon sa sunod nga mga hugna.
Ang pagtaas sa toll rate gihimo aron matabangan ang Cebu Cordova Link Expressway Corporation (CCLEC) nga mabawi ang dugang nga galastusan panahon sa COVID-19 pandemic ug bagyong Odette, nga nakaapekto sa pagtukod sa proyekto. Ang kasabutan bahin niini gisabotan sa Cebu City Government, Cordova Municipal Government, ug sa CCLEC.
Matod sa CCLEC President ug General Manager nga si Allan G. Alfon, ila kining buhaton sa hinay-hinay aron dili kaayo mabug-atan ang mga muagi sa maong tulay.
Ang mga bag-ong toll rates mao ang mosunod: ₱68 para sa Class 1M (110cc–399cc nga motor), ₱107 para sa Class 1 (sakyanan, 400cc pataas nga motor), ₱214 para sa Class 2 (bus ug light trucks), ug ₱321 para sa Class 3 (dagkong truck ug trailer). Apan, discounted rates sa ₱65, P100, P200, ug ₱300 una ang ipatuman pagsugod Hulyo 1.
Sukad sa pag-abli sa CCLEX niadtong Abril 2022, dako na ang natabang niini sa transportasyon. Gibana-bana nga napamubo ang biyahe gikan sa Cebu City paingon sa Cordova o Lapu-Lapu gikan sa 82-85 minutos ngadto lang sa mas mubo nga 20-30 minutos depende sa oras.
Tungod sa CCLEX, mas dali na karon ma-access ang mga yuta sa Cordova, nga nagpadali sa pagdani sa mga negosyante ug mga nagbubo og puhunan. Nakahatag usab kini og kusog sa turismo ug lokal nga ekonomiya pagkahuman sa pandemya.
Gikatakdang palapdan pa sa CCLEC ang expressway pinaagi sa mga koneksyon paingon sa downtown Cebu City ug sa Mactan Cebu International Airport, aron mas paspas ug mas sayon ang biyahe alang sa tanan.
Source: CCLEX
I via Renante Socia Lada