Paspas nga tubag sa kapulisan ang nagdala sa dinali-ang nga pagdakop sa suspetsado sa pagpamusil patay sa usa ka residente sa Lapu-Lapu City atol sa kasadya sa fiesta, diin nasikop kini sulod lang sa pipila ka oras human sa insidente.
Sumala sa Lapu-Lapu City Police Office (LCPO), ang krimen nahitabo pasada alas 4:55 sa kadlawon niadtong Nobyembre 21, kung diin ang 38-anyos nga biktima gipusil sa likod sa usa ka lalaki nga nailhan sa alyas “Toklits.” Giingong hilabihan ang kahubog sa suspetsado samtang nagselebrar sa pista sa komunidad.
Ang biktima nakapangayo pa og tabang sa mga silingan sa wala pa siya mawad-an sa panimuot, naila pa niya ang suspetsado nga iyang dugay nang nakaaway. Gidali siya pagdala sa Lapu-Lapu City District Hospital apan gideklarar kining patay pag-abot, pasado alas 1:30 sa hapon.
Tungod sa kaalerto sa kapulisan, gilusad dayon sa LCPO ang hot pursuit operation. Pagsulod sa alas 7:00 sa gabii, o dili pa molabaw og unom ka oras gikan sa hitabo, malampuson nilang nadakpan si “Toklits” sa Purok Ube. Nakumpiskar usab ang .357 revolver nga maoy gigamit sa pagpamusil.
Gilauman nga mapasaka dayon ang kaso batok sa suspetsado samtang nagpadayon ang imbestigasyon sa kapulisan aron matino ang tibuok hinungdan sa away ug krimen.
Source: LCPO
I via Renante Socia Lada