Nadakpan ang usa ka taxi driver nga giingong suspek sa pangpanglugos sa usa ka paspas nga operasyon nga gihimo sa Cebu Police Provincial Office (CPPO Sabado sa udto, Nobyembre 1, 2025. Ang suspek lumolupyo sa Cebu City, nadakpan human madawat sa kapulisan ang usa ka Flash Alarm nga nagsulti nga siya sakay sa taxi gikan sa Carmen padulong sa Cebu City.
Pagdawat sa alarma alas 11:00 sa buntag, dali nga nibuhat og lihok ang mga kapulisan sa tibuok lalawigan. Pag-abot sa alas 11:55 sa buntag, nasikop ang taxi sa Sitio Gemilina, Barangay Estaca, Compostela pinaagi sa chokepoint nga giestablisar sa Compostela Police Station uban ang tabang sa 1st PMFC. Dayon gipriso ang suspek ug gisiguro ang sakyanan. Pagka alas 12:29 sa udto, gihatod ang suspek ug taxi ngadto sa Station 4, Mabolo, Cebu City alang sa dokumentasyon ug pormal nga imbestigasyon.
Gidayeg ni PCOL Abubakar Udang Mangelen Jr., Provincial Director sa CPPO, ang paspas ug organisado nga lihok sa tanang yunit nga nalambigit. Matod niya, kini nagpakita sa tinuoray nga pagpaningkamot sa kapulisan sa pagpanalipod sa katawhan ug pagsiguro nga ang mga kriminal madakpan ug maatubang sa hustisya. Gidayeg usab niya nga kini usa ka ehemplo sa liderato ni PBGEN Redrico A. Maranan, Regional Director sa PRO7, nga nagdasig sa disiplina ug moderno nga pagdumala sa kapulisan.
Gipasidungog usab sa report ang lig-on nga koordinasyon sa City ug Provincial Tactical Operation Centers, nga maoy nakatabang sa dali nga pagpatuman sa mga checkpoint ug sa lalawigan. Gipasabot sa CPPO nga nasunod ang tanang pamalaod ug human rights atol sa operasyon, ug gihangyo nila ang publiko nga magpabilin nga alerto ug mag-report dayon sa mga kadudahang kalihokan sa ilang lugar.
Source: CPPO
I via Renante Socia Lada