Nadakpan sa kapulisan ang suspek sa pagpusil ug pagpatay sa usa ka babaye sa Argao human sa dali nga hot pursuit operation nga gilusad pipila lang ka oras human sa insidente sa Barangay Langtad.
Sumala sa Cebu Police Provincial Office o CPPO, nadakpan sa Argao Municipal Police Station ang suspek ug ang iyang gituohang kauban kagahapon Marso 7, 2026, alas 5:35 sa hapon sa maong barangay. Narekober usab sa operasyon ang usa ka Colt MK IV caliber .45 nga pistola, usa ka steel magazine ug tulo ka buhing bala nga gidudahang gigamit sa krimen.
Ang insidente nahitabo niadtong Marso 6, 2026, mga alas 9:30 sa gabii, diin nakadawat og report ang kapulisan bahin sa pagpamusil. Sa pag-abot sa mga pulis sa lugar, ilang nakita ang biktima nga babaye nga naghigda tupad sa bangko nga kahoy, puno sa dugo ug wala nay kinabuhi.
Sa inisyal nga imbestigasyon, nasayran nga naglingkod ang biktima sa dihang kalit mitungha ang suspek ug gipusil siya sa makadaghang higayon sa wala pa mikalagiw padulong sa ngitngit nga dapit. Nakita usab sa Scene of the Crime Operatives og pipila ka personal nga butang sa biktima lakip ang tulo ka ₱100 nga kwarta ug usa ka bulawan nga kuwintas.
Sa paspas nga follow-up investigation ug padayon nga pagtracking sa kapulisan maoy naka-tabang aron mailhan ug madakpan dayon ang suspek sa sunod adlaw.
Gidayeg ni PCol. Abubakar Udang Mangelen Jr., direktor sa Cebu Police Provincial Office, ang mga pulis nga nagpatuman sa operasyon tungod sa ilang paspas nga aksyon sa pagsulbad sa kaso. Matod pa niya, nagpakita kini sa dedikasyon sa kapulisan sa pagpanalipod sa komunidad ug pagpasiguro nga manubag sa balaod ang mga responsable sa krimen.
Padayon pa ang imbestigasyon sa kapulisan aron mahibal-an ang tinuod nga motibo sa krimen ug aron maseguro nga ang tanang nalambigit manubag sa balaod.
Source: CPPO
I via Renante Socia Lada