Padayon sa pagpangita ang kapulisan sa usa ka lalaki nga nailhan lang sa alyas “Alex”, nga maoy giingong responsable sa pagpamusil sa Barangay Poblacion, Boljoon, niadtong hapon sa Oktubre 27, 2025, nga miresulta sa pagkamatay sa usa ka 47-anyos nga residente.
Base sa inisyal nga imbestigasyon, ang biktima nagkarga og balas ug graba duol sa suba alas 4:40 sa hapon, dihang nadungog ang usa ka buto sa armas sa nakasaksi.
Naigo kini sa wala nga bahin sa aping ug dali kining gidala sa Oslob District Hospital ug dayon gibalhin sa Cebu City alang sa dugang tambal. Apan, gideklarar siyang patay alas 8:00 sa buntag sa Oktubre 28, 2025.
Sa pagresponde sa insidente, narekober sa mga pulis ang usa ka caliber .45 MK IV pistol nga adunay upat ka buhing bala ilawom sa higdaan sa gipuy-an sa suspetsado, ug usa ka basiyo sa bala sa crime scene.
Ang suspetsado nga si “Alex” giingong trabahante sa usa ka amusement establishment ug lumad sa Tiguma, Pagadian City. Gituohan nga adunay personal nga relasyon kini sa biktima, ug padayon pa karon ang kapulisan sa pag-ils sa iyang tinuod nga identidad ug motibo sa krimen.
Si Police Colonel Abubakar Udang Mangelen Jr., Cebu Police Provincial Director, misiguro sa publiko nga padayon ang hiniusang operasyon aron madakpan ang suspetsado.
Sa laing bahin, si Cebu Governor Pamela S. Baricuatro mipahimangno sa mga kriminal nga buot mangdaot sa probinsya: I’m sick and tired of illegal activities ruining our province. This is your final warning. Leave now – or prepare to be taken down.”
Padayon ang follow-up operation ug gikatakda nga ipasaka ang kasong homicide batok sa suspetsado.
Source: CPPO
I via Renante Socia Lada