Padayon ang presensya sa mga sakop sa Traffic Enforcement Agency of Mandaue (TEAM) sa dalan paingon sa norte aron motabang sa Department of Public Works and Highways (DPWH) human masangit ang usa ka trailer truck ilawom sa skywalk sa Consolacion kagahapon sa hapon Agosto 2, 2025.
Sa pinaka ulahi nga update alas 10:30 sa gabii, gipasabot sa TEAM nga naanay mga personnel sa DPWH sa lugar ug andam nang kuhaon ang skywalk tungod kay delikado na kini sa mga motorista human kini madaot sa insidente.
Gipasabot pa sa DPWH kung ipasira ba ang duha ka linya sa dalan, ug ilang ipahibalo dayon sa TEAM ang resulta aron ang mga traffic personnel makagiya sa mga motorista padulong sa mga likoang dalan o diversion roads.
Ang TEAM traffic personnel nagpahibalo sa mga bus ug truck nga pwede silang moagi sa Cansaga Bridge kung ang ilang destinasyon mas layo pa sa Consolacion, aron malikayan ang grabeng trapiko.
Kung ang biyahe kutob ra sa Consolacion, pwede pa motuyok padulong sa lungsod. Apan, mga gagmayng sakyanan ra ang pwede mobalik paingon sa dalan kilid sa Fooda Consolacion nga moawas padulong sa kanto duol sa Jollibee.
Ang maong insedente nakamugna og grabing kahuot sa trapiko. Padayon pa usab ang imbestigasyon aron manubag ang responsabli niini.
I via Renante Socia Lada