Gisugdan kagahapon Abril 22 ang Cebu Maritime Expo and Conference 2026 sa IEC Convention Center Cebu, diin mitambong si Mayor Nestor Archival Sr. aron mosalmot sa opening ceremony.
Ang tulo ka adlaw nga kalihokan gi-organisar sa One Maritime Group ug nagtigom sa mga lider, stakeholders, ug partner sa maritime industry. Tumong niini ang pagpalambo sa sektor ilawom sa tema nga nagpunting sa mas lig-on nga kaugmaon sa maritime industry.
Sa maong seremonya, gipakita ang mga tradisyonal nga programa sama sa cultural presentations, invocation, ug pagpasulod sa bandila, gisundan sa mga mensahe gikan sa mga lider sa industriya ug opisyal sa gobyerno.
Mitambong usab si Gob. Pamela Baricuatro ug mga opisyales gikan sa Philippine Navy, Philippine Coast Guard, ug uban pang ahensya nga may kalabotan sa maritime sector.
Gihatagan og keynote speech ang kalihokan ni Sonia Malaluan gikan sa Maritime Industry Authority, diin gihisgutan ang kabag-ohan, pagpalambo sa workforce, ug sustainable growth sa industriya.
Human sa opening, gisundan kini sa ribbon-cutting ug pagtan-aw sa exhibits nga nagpakita sa lain-laing teknolohiya, serbisyo, ug job opportunities sa maritime sector.
Ang Cebu Maritime Expo 2026 modagan hangtod Abril 24, uban sa mga conference, exhibits, ug diskusyon nga nagtumong sa pagpalig-on sa maritime industry ug pagpasigarbo sa Cebu isip usa ka importante nga sentro sa maritime sa nasud.
Source: Cebu City PIO
I via Renante Socia Lada