Trahedya ang nahitabo sa Carcar City, Cebu human malumos ang usa ka 61-anyos nga lalaki samtang nanagat sa baybayon sa Sitio Bonbon, Barangay Ocaña, Domingo sa buntag, Mayo 3.
Ang biktima giila nga si Apolonio Amanduron Tanoy, residente sa Sitio Lagang sa maong barangay.
Base sa imbestigasyon sa Carcar City Police Station, nanagat si Tanoy pasado alas 10 sa buntag uban sa iyang silingan nga si Eval Porcia, gamit ang spearfishing bisan wala silay sakayan ug kulang sa gamit.
Sa dihang misulay na siyag langoy pabalik sa baybayon, kalit siyang nasakpan sa kusog nga sulog sa dagat nga maoy hinungdan nga nadala siya palayo.
Bisan pa og gidala sa ospital, gideklarar siyang patay sa doktor. Ang insidente na-report sa kapulisan pasado alas 2:55 sa hapon sa maong adlaw.
Giklaro sa kapulisan nga walay foul play sa nahitabo ug gituohan kini nga aksidente lamang, nga giuyunan usab sa pamilya sa biktima nga dili na magpa-autopsy.
I via Renante Socia Lada