Gipadala sa Police Regional Office 7 (PRO7) ang mga espesyal nga maritime ug tactical units aron mas lig-on ang relief ug security operations sa Northern Cebu human sa kusog nga 6.9 magnitude nga linog nga miigo sa rehiyon.
Niabot sa Polambato Port, Bogo City, alas 2:15 sa kadlawon niadtong Oktubre 2, ang usa ka seaborne patrol unit nga gilangkoban sa 17 ka personahe gikan sa Regional Maritime Unit 8 ug usa ka tauhan sa PNP Explosive Ordnance Disposal (EOD). Ang ilang misyon mao ang pagsiguro sa coastal entry point ug pagtabang sa mga apektadong komunidad.
Dugang pa niini, mga mobile patrol team gikan sa Cebu City ug Bohol Maritime Police Stations miabot aron maghatag og medical assistance, pag-escort sa pasyente ngadto sa mga ospital, ug pagsiguro sa kaluwasan sa publiko ug mga responders.
Sugod alas 9:00 sa buntag sa Oktubre 2, 2,250 ka personahe na ang gideploy sa PRO7 uban sa mga sakyanan sama sa patrol cars, ambulansya, man trucks, ug motorsiklo aron suportahan ang operasyon sa mga ospital, evacuation centers, ug mga komunidad.
Matod pa ni PRO7 Director PBGEN Redrico A. Maranan, nagtinabangay ang maritime ug ground units aron mahatagan og tabang ang katawhan ug maprotektahan ang kalinaw.
Giawhag niya ang publiko nga magpabilin nga mabinantayon, mosunod sa safety protocols, ug maminaw lang sa opisyal nga pahibalo gikan sa PHIVOLCS, CDRRMC, MDRRMC ug PNP.
Source: PRO7- PIO
I via Renante Socia Lada